يوں نہ تھا ميں نے فقط چاہا تھا يوں ہو جائے

ہمیں ماتھے پے بوسہ دو۔۔

کہتے ہیں طبیعات کے اصول ماضی حال مستقبل اور خلاء میں یکساں رہتے ہیں۔ بات تو ماننے والی ہے اور کوئی بھی ذی ہوش آدمی اس کی نفی نہیں کرسکتا لیکن چچا نیوٹن اور پھوپھا آئن سٹائن کا ہمارے ملک کے بارے میں کیا خیال ہوتا؟ کیا طبعیاتی اور معاشرتی قوانین میں اس خطہ زمین کے لیے مثتثنیات رکھی جاتیں اور قوانین کچھ اسطرح بیان کیے جاتے

ہر عمل کا رد عمل ہوتا ہے “لیکن“ پاکستان میں صرف رد عمل ہوتا ہے عمل نہیں ۔ مقالے کی منظوری کے لیے ساٹھ سالہ اخباری ردی کے تمام بیانات شائع کیے جاتے ہیں جہاں ہر سیاسی جماعت اور سیاستدان کا رد عمل موجود ہوتا اور عمل نہیں۔ فوجی حکومت ہو یا سیاسی ، بات متنازعہ خاکوں کی ہو یا عراق جنگ گی صرف “ردعمل“‌

ایک عام تاثر یہ بھی ہے کے زیادہ تر ایسی جگہیں جہاں انسان بستے ہوں قانونی کام کرنا آسان اور غیر قانونی کام کرنا پیچیدہ اور مشکل ہوتا ہے “لیکن“ پاکستان ایک ایسی جگہ ہے جہاں ماورائے آئین کام کرنا ہو تو کسی حیل حجت کی ضرورت نہیں کر ڈالیے، جمہوری حکومت کر برطرف کرنا ہو یا سوموٹو عدلیہ کا نام و نشان مٹانا ہو ماورائے قانون جا کر کرڈالیے کیونکہ جب بات قانون کے دائرے میں بحالی کی آئے گی تو پھر کام پیچیدہ ہوجائے گا اور بقول شخصے
میں مانتا ہوں یہ سچ ہے لیکن، یہ کیسے کہہ دوں یونہی ہوا تھا۔

یہ بھی ایک جانا مانا اصول ہے کے ہر چیز بہتری کی طرف جاتی ہے اور وقت کے ساتھ ساتھ ارتقاء کی منازل طے کرتے ہوئے ہر چیز میں بہتری آتی ہے “لیکن“ پاکستان میں کوئی بھی چیز پہلے دن اپنی بہترین حالت میں ہوتی ہے اسکے بعد ہر گزرنے والا لمحہ “میٹا بولزم“‌ کے عمل کو تیز سے تیز تر کرتا جاتا ہے۔ بات آئین کی ہو یا کسی ادارے کی، بات سڑک کی ہو یا کسی نو تعمیر شدہ عوامی بہبود کے ادراے کی عمارت کی پہلا دن اسکے عروج کا دن ہوتا ہے پھر “کبھی ہم خوبصورت تھے“‌ کی منہ بولتی تصویر۔

خیر صاحب ہم نے تو ہر سائنسی اور معاشرتی قانون آزما کر دیکھ لیا لیکن کوئی اصول اس طرح لاگو نہیں ہوا جیسا کے کتابوں میں لکھا ہے۔ آپ بھی کوشش کریں شاید کوئی کامیابی حاصل ہوجائے؟